NGA MUKADES DERVISHI
Një aksident fatal në orët e para të mëngjesit në rrethrrotullimin e Kolonjës në autostradën Fier-Lushnje i ka marrë jetën një të riu nga Tirana, duke rritur shqetësimin për sigurinë në këtë segment rrugor që prej kohësh konsiderohet një pikë e zezë për aksidentet.
Një tjetër ngjarje tragjike ka ndodhur sot rreth orës 4:30 të mëngjesit në rrethrrotullimin e Kolonjës, një zonë që vazhdon të mbetet ndër më të rrezikshmet në autostradën Fier-Lushnje. Një automjet tip Volkswagen Golf, me targa AB 789 RA, ka dalë nga rruga dhe ka përfunduar në kanalin kullues pranë rrethrrotullimit, duke shkaktuar vdekjen e drejtuesit të mjetit, një 28-vjeçar nga Tirana.
Menjëherë pas ngjarjes, në vendin e aksidentit kanë mbërritur forcat e Policisë së Lushnjes, të cilët kanë thirrur në ndihmë edhe zjarrfikësit për të nxjerrë automjetin nga kanali. Ndërkohë, policia shkencore ka nisur hetimet për të dokumentuar çdo detaj të incidentit dhe për të sqaruar shkaqet që çuan në këtë tragjedi.
Sipas të dhënave paraprake, dyshohet se aksidenti ka ndodhur për shkak të përgjumjes së drejtuesit të mjetit, i cili ka humbur kontrollin dhe për pasojë, automjeti ka goditur barrierën mbrojtëse të rrugës, duke përfunduar më pas në kanalin kullues. Dyshimet kryesore janë se shpejtësia e lartë ka ndikuar në rëndimin e pasojave.
Ekspertiza mjeko-ligjore pritet të japë përgjigje të qarta mbi shkaqet e vdekjes së 28-vjeçarit, për të përcaktuar nëse ai ka humbur jetën si pasojë e përplasjes apo nga mbytja pas rënies në kanal. Ndërkohë, trupi i viktimës është dërguar në morgun e Lushnjes për veprimet e mëtejshme procedurale.
Ky aksident shton edhe më tej bilancin e ngjarjeve të rënda në këtë segment rrugor, duke rikthyer vëmendjen te domosdoshmëria e marrjes së masave të menjëhershme për rritjen e sigurisë në rrethrrotullimin e Kolonjës, i cili vijon të jetë një ndër pikat më të rrezikshme të qarkullimit në jug të vendit.
