Mbrojtësi i Kombëtares shqiptare, Adrian Bajrami, transferohet në Zvicër dhe firmos me Luzernin deri në qershor të vitit 2026.
Adrian Bajrami ka vendosur për të ardhmen e tij sportive, duke lënë pas periudhën me Benficën për t’u bashkuar me Luzernin në Superligën zvicerane. Lëvizja u zyrtarizua nga të dy klubet, ndërsa marrëveshja parashikon huazimin e mbrojtësit për dy sezone, deri në qershor të vitit 2026.
Klubi i Luzernit e konfirmoi afrimin me një komunikatë zyrtare ku vlerësoi cilësitë e qendërmbrojtësit shqiptar. “Me Adrianin, po fitojmë një mbrojtës qendror të fortë. Ai gjithashtu ka cilësi të lindura udhëheqëse që do të ndihmojnë ekipin tonë”, u shpreh drejtori sportiv Remo Meyer.
Ky është një hap i rëndësishëm në karrierën e Bajramit, i cili kërkon më shumë minuta në fushë dhe një ambient ku mund të ketë një rol më të madh. Te Luzerni, ai pritet të jetë një nga shtyllat e mbrojtjes dhe të kontribuojë në objektivat e ekipit për sezonin e ardhshëm.
23-vjeçari është pjesë e Kombëtares shqiptare dhe shihet si një alternativë e qëndrueshme për repartin mbrojtës. Me këtë transferim, ai synon të fitojë më shumë hapësira edhe në përfaqësuesen kuqezi.
Bajrami kishte një rrugëtim të gjatë me klubin portugez Benfica, ku kaloi kryesisht me ekipin B dhe nuk arriti të konsolidohej në formacionin e parë. Tani, në kampionatin zviceran, ai kërkon të rikthejë vëmendjen e trajnerëve dhe të rrisë nivelin e tij konkurrues.
Transferimi në Zvicër shihet gjithashtu si një rikthim afër rrënjëve, pasi vetë Bajrami është lindur dhe rritur në Zvicër, ku ka hedhur hapat e parë si futbollist. Kjo e bën ambientimin më të lehtë dhe rrit pritshmëritë për një paraqitje të suksesshme në këtë fazë të re të karrierës së tij.
