Prej tre dekadash, bujqësia është cilësuar si një nga shtyllat kryesore të ekonomisë shqiptare. Projekte, programe dhe fonde të konsiderueshme, përfshirë mbështetjen nga Bashkimi Evropian, kanë synuar zhvillimin e këtij sektori.

Por për fermerët, një problem mbetet ende i pazgjidhur: siguria e prodhimit përballë fatkeqësive natyrore.

Prej vitesh, në takime me ministrat e Bujqësisë, gjatë fushatave elektorale apo përmes deputetëve që përfaqësojnë zonat rurale, fermerët kanë përsëritur të njëjtën kërkesë: shteti duhet të krijojë një mekanizëm që t’i mbrojë ekonomikisht kur prodhimet e tyre dëmtohen nga përmbytjet, breshëri, thatësirat apo fatkeqësi të tjera natyrore.

Edhe pse kanë kaluar më shumë se 36 vite nga vendosja e sistemit demokratik, një skemë e qëndrueshme sigurimi për bujqësinë nuk është bërë ende realitet.

Tashmë flitet se nisma për sigurimin e fermerëve nga fatkeqësitë natyrore është në fazat e fundit të projektimit.

Por fermerët mbeten skeptikë dhe shtrojnë pyetjen:

A do të jetë kjo një zgjidhje përfundimtare dhe funksionale për mbrojtjen e bujqësisë, apo një tjetër projekt që do të përfundojë në sirtarët e institucioneve?

Pas dekadash pritjeje, fermerët kërkojnë jo më premtime, por siguri konkrete për punën, investimin dhe prodhimin e tyre.