Negociatat mes Milanit dhe Leverkusen për Granit Xhakën kanë ngecur, pasi palët nuk bien dakord për çmimin final të kartonit
Transferimi i mesfushorit shqiptar Granit Xhaka te Milani është futur në një fazë delikate, pasi tratativat mes “Djallit” dhe Bayer Leverkusen janë bllokuar për shkak të kërkesave financiare të ndryshme. Megjithëse interesimi i kuqezinjve mbetet i fortë, klubi gjerman nuk ka ndërmend të lëshojë nga pretendimet ekonomike.
Sipas burimeve pranë klubeve, Bayer Leverkusen kërkon plot 15 milionë euro për të liruar kartonin e Xhakës. Në anën tjetër, drejtuesit e Milanit janë të gatshëm të paguajnë jo më shumë se 10 deri në 12 milionë euro, duke krijuar kështu një hendek që ka ndalur për momentin përparimin e marrëveshjes.
Negociatat janë aktualisht të ngrira dhe nuk ka asnjë sinjal pozitiv që një marrëveshje mund të arrihet së shpejti. Për më tepër, nuk janë parashikuar takime të reja mes palëve në ditët në vijim, gjë që e komplikon edhe më shumë situatën.
Pavarësisht bllokimit aktual, drejtuesit e Milanit nuk janë të gatshëm të heqin dorë. Ata e konsiderojnë Xhakën një element kyç për projektin e ri dhe synojnë të vazhdojnë përpjekjet për të arritur një marrëveshje përfundimtare para përfundimit të merkatos.
Xhaka, i cili ka pasur një sezon të shkëlqyer në Bundesligë, shihet nga trajneri i Milanit si pikë kyçe për të përforcuar mesfushën, veçanërisht në aspektin e qëndrueshmërisë dhe eksperiencës në kompeticione të mëdha.
Kjo situatë mbetet për t’u ndjekur, ndërsa tifozët e Milanit presin me padurim një rezultat përfundimtar që do ta sillte Xhakën në “San Siro” pas një vere plot spekulime.
