Procesi i numërimit të votave pas zgjedhjeve të mbajtura dje në Kosovë ka përfunduar, duke konfirmuar një epërsi të thellë të Lëvizjes Vetëvendosje, e cila ka siguruar rreth 41% të votave, sipas të dhënave zyrtare të Komisionit Qendror të Zgjedhjeve (KQZ).
Në vendin e dytë renditet Partia Demokratike e Kosovës (PDK) me 22.16% të votave, ndërsa Lidhja Demokratike e Kosovës (LDK) pozicionohet e treta me 17.6%.
Aleanca për Ardhmërinë e Kosovës (AAK) ka siguruar 7.46% të votave, duke u renditur e katërta, ndërsa Lista Serbe, e cila përfaqëson komunitetin serb në Kosovë, ka marrë 4.43% të votave.
Megjithëse numërimi i votave brenda Kosovës është përmbyllur, procesi nuk është ende i plotë, pasi pritet të nisë numërimi i votave të diasporës. Shqiptarët që jetojnë jashtë vendit kanë votuar në kutitë e vendosura në ambasada dhe konsullata, si dhe përmes postës.
Analistët vlerësojnë se votat e diasporës mund të kenë ndikim të rëndësishëm në rezultatet përfundimtare, veçanërisht për ndarjen e mandateve në Kuvendin e Kosovës.
Ndërkohë, pritet që subjektet politike të analizojnë rezultatet dhe të bëjnë lëvizjet e tyre për formimin e qeverisë së re, në varësi të mandateve të fituara.
Zgjedhjet në Kosovë janë zhvilluar në një klimë të qetë dhe pa incidente të mëdha, ndërsa institucionet përkatëse kanë konfirmuar respektimin e standardeve demokratike gjatë procesit.
