Vaji i ullirit ka qenë prej shekujsh një nga kurat më të vlerësuara për shëndetin, dhe sipas Hipokratit, i njohur si “Babai i Mjekësisë”, ai është një nga lëngjet më të mira terapeutike për organizmin.
Përfitimet e tij shtrihen edhe në trajtimin e problemeve të rrugëve të frymëmarrjes, duke përfshirë kollën e vazhdueshme dhe acarimin e fytit.
Kolla, e cila mund të bëhet e lodhshme dhe shqetësuese, mund të lehtësohet ndjeshëm me konsumimin e vajit të ullirit. Ky produkt i çmuar vepron si një lubrifikues natyral për fytin, duke pakësuar frekuencën e kollitjes dhe nevojën për të pastruar rrugët e frymëmarrjes.
Sipas ekspertëve të shëndetit, pirja e një luge gjelle me vaj ulliri çdo ditë ndihmon në forcimin e imunitetit dhe në mbrojtjen nga irritimet e fytit. Për fëmijët, rekomandohet një lugë çaji me vaj ulliri, të ëmbëlsuar me pak sheqer për një shije më të pranueshme.
Një mënyrë efektive për ta përdorur këtë produkt është përgatitja e një shurupi natyral kundër kollës. Për këtë recetë, nevojiten gjysmë gote vaj ulliri, çerek gote lëng limoni dhe çerek gote mjaltë. Përbërësit ngrohen lehtë dhe përzihen mirë, ndërsa shurupi i përftuar mund të konsumohet nga një lugë gjelle çdo dy ose tre orë për të zbutur inflamacionin dhe për të lehtësuar kollën.
Vaji i ullirit është gjithashtu një armë e fuqishme kundër inflamacionit të fytit. Studimet kanë treguar se ai përmban përbërës anti-inflamatorë të ngjashëm me ato të disa ilaçeve farmaceutike, duke e bërë një zgjidhje natyrale për ata që vuajnë nga acarimi i grykës për shkak të pluhurave apo alergjive.
Megjithatë, pavarësisht përfitimeve të tij të shumta, është e rëndësishme që njerëzit të tregohen të kujdesshëm. Nëse kolla është e fortë, shoqërohet me dhimbje në fyt dhe qafë ose zgjat për një kohë të gjatë, rekomandohet konsultimi me një mjek. Ai mund të përcaktojë nëse bëhet fjalë për një infeksion bakterial ose një problem më serioz shëndetësor.
Ndërsa kurat natyrale si vaji i ullirit mund të ndihmojnë në lehtësimin e simptomave të lehta, kujdesi dhe diagnostikimi i saktë janë thelbësore për të shmangur komplikimet shëndetësore.
