Portokalli është një nga frutat më të dashura për shijen e tij të freskët dhe të ëmbël, por përfitimet e tij shkojnë përtej kënaqësisë së shijes.
Ky agrum përmban pak kalori, nuk ka yndyrë apo kolesterol dhe është i pasur me fibra, minerale dhe vitamina thelbësore për organizmin.
Një kokërr portokall përmban rreth 170 substanca ushqyese dhe 60 lloje antioksidantësh, duke e bërë atë një burim të rëndësishëm të kaliumit, një mineral i domosdoshëm për funksionimin e shëndetshëm të zemrës.
Një studim i fundit ka treguar se konsumi i agrumeve, si portokallet dhe limonët, mund të ndihmojë në parandalimin e sëmundjeve të zemrës, të cilat shpesh lidhen me mbipeshën, problemet e mëlçisë dhe diabetin. Këto fruta ndihmojnë në reduktimin e stresit oksidues, një faktor që ndikon drejtpërdrejt në dëmtimin e qelizave të shëndetshme dhe rrit rrezikun e inflamacionit.
Edhe pse portokalli nuk ka një ndikim të drejtpërdrejtë në humbjen e peshës, ai luan një rol kyç në minimizimin e pasojave të konsumit të ushqimeve të pasura me yndyrna, duke zvogëluar rrezikun e sëmundjeve të lidhura me mbipeshën. Ekspertët theksojnë se përfitimet e portokallit nuk kufizohen vetëm tek individët mbipeshë, por janë të rëndësishme për të gjithë, pasi ndihmojnë në mbrojtjen e trupit nga inflamacioni dhe sëmundjet kronike.
Përveç vitaminës C, e cila është e njohur për fuqinë e saj antioksiduese, portokalli është i pasur edhe me vitaminën A, e cila është jetike për shikimin dhe shëndetin e qelizave. Po ashtu, ky frut përmban vitaminat e kompleksit B, si thiamina, pyridoksina dhe folati, që ndihmojnë në funksionimin e sistemit nervor.
Një tjetër përfitim i rëndësishëm i portokallit është ulja e rrezikut të ishemisë. Flavanonet e pranishme në këtë agrum ndihmojnë në përmirësimin e qarkullimit të gjakut, duke reduktuar me 19% rrezikun e ishemisë, veçanërisht tek femrat që konsumojnë rregullisht këtë frut. Gjithashtu, vitamina C ndihmon në parandalimin e hemoragjisë cerebrale.
Edhe lëngu i portokallit është një burim i fuqishëm antioksidantësh dhe ndihmon në mbrojtjen e organizmit kundër dëmtimeve të qelizave. Konsumimi i tij rregullisht mund të ketë një ndikim pozitiv në shëndetin e përgjithshëm, duke mbrojtur trupin nga një sërë sëmundjesh.
