Interi pësoi një disfatë të rëndë në “Franchi”, ku Fiorentina e deklasoi me rezultatin 3-0, duke i dhënë fund një ecurie të gjatë pa humbje për zikaltërit.
Ndeshja u rifillua nga minuta e 17-të, pas ndërprerjes së saj për shkak të ngjarjes dramatike me Bove, i cili fatmirësisht shmangu një tragjedi.
Skuadra e Simone Inzaghit tregoi një version të zbehtë të vetes, duke u shfaqur e lodhur dhe pa ide, ndërsa Fiorentina shfrytëzoi çdo pasaktësi të kundërshtarit. Goli i parë erdhi në minutën e 59-të, kur Ranieri ndëshkoi Interin me një goditje të saktë. Nuk kaluan shumë minuta dhe në të 68-tën, Moise Kean dyfishoi rezultatin me një goditje të fuqishme me kokë.
Trajneri Inzaghi reagoi duke bërë ndryshime në formacion, mes tyre zëvendësimi i Calhanoglu dhe aktivizimi i Asllanit në minutën e 83-të. Megjithatë, Fiorentina nuk u ndal me kaq dhe në minutën e 85-të, Kean shënoi golin e dytë personal, pas një gabimi të rëndë nga Dimarco.
Ky triumf e ngjit përkohësisht Fiorentinën në zonën Champions, duke u pozicionuar në vendin e katërt, ndërsa Interi zbret në vendin e dytë, me Napolin që tani kryeson kampionatin me tre pikë avantazh.
Në përfundim të ndeshjes, Simone Inzaghi mori përsipër përgjegjësinë për këtë disfatë, duke pranuar se skuadra e tij nuk ishte në lartësinë e duhur. “Ishte një humbje e merituar dhe unë mbaj përgjegjësinë. Nuk dhamë asgjë në fushë, ndërsa kundërshtarët ishin superiorë. Por, nuk duhet të harrojmë se ky grup nuk kishte humbur prej afro katër muaj e gjysmë,” deklaroi ai.
Mediat italiane nuk vonuan të reagojnë për këtë rezultat surprizë. “Inter bëhet vjollcë. Fiorentina trondit kampionët, e shijon Conte,” ishte një nga titujt kryesorë të shtypit sportiv.
Kjo humbje e rëndë hedh dyshime mbi formën e Interit dhe ngre pikëpyetje mbi aftësinë e tyre për të rivalizuar në garën për titull, ndërkohë që Fiorentina vazhdon të befasojë dhe të synojë zonën e Champions League.
