Presidenti Donald Trump ka deklaruar se Shtetet e Bashkuara mund të marrin përsipër rindërtimin dhe stabilizimin e Rripit të Gazës, duke propozuar zhvendosjen e palestinezëve në vendet fqinje.
Kjo ide, e cila mund të përmbysë qasjen e deritanishme të SHBA ndaj konfliktit izraelito-palestinez, u shpalos gjatë një konference për shtyp me kryeministrin izraelit, Benjamin Netanyahu.
Gjatë fjalës së tij, Trump e cilësoi Rripin e Gazës si një “zonë të shkatërruar” dhe u shpreh i gatshëm për të marrë kontrollin mbi territorin, me qëllim eliminimin e municioneve të pashpërthyera dhe rindërtimin e tij. “Nëse është e nevojshme, ne do ta marrim atë pjesë, do ta zhvillojmë dhe do të krijojmë mijëra vende pune,” tha ai, duke e përshkruar këtë projekt si një mundësi për një të ardhme më të qëndrueshme në Lindjen e Mesme.
I pyetur për fatin e palestinezëve, Trump sugjeroi që Gaza të bëhet një “shtëpi për njerëzit e botës”. Ai gjithashtu përsëriti thirrjen e tij ndaj Jordanisë, Egjiptit dhe vendeve të tjera arabe për të pranuar banorët e Gazës, duke argumentuar se ata nuk kanë asnjë alternativë tjetër pas luftës shkatërruese mes Izraelit dhe Hamasit.
Ky propozim ka nxitur reagime të ashpra. Hamas e ka dënuar idenë e zhvendosjes së popullsisë, duke e quajtur atë një përpjekje për “spastrim etnik”. Një nga zyrtarët e grupit, Sami Abu Zuhri, deklaroi se populli i Gazës nuk do të lejojë realizimin e një plani të tillë.
Takimi mes Trump dhe Netanyahut, i pari që nga fillimi i mandatit të dytë të presidentit amerikan, u përqendrua gjithashtu në strategjinë kundër Iranit dhe përpjekjet për një marrëveshje normalizimi mes Izraelit dhe Arabisë Saudite. Trump ka ndërmjetësuar më parë marrëveshje mes Izraelit dhe katër shteteve arabe dhe tani synon të sigurojë një marrëveshje më të gjerë me Riadin.
Megjithatë, Arabia Saudite ka bërë të qartë se nuk do të normalizojë marrëdhëniet me Izraelin pa një zgjidhje për palestinezët. Riadit i kërkon një rrugë të qartë për krijimin e një shteti palestinez në Gaza, Bregun Perëndimor dhe Jeruzalemin Lindor, kërkesë që bie në kundërshtim me politikën e qeverisë së Netanyahut.
Lufta në Gaza, e cila nisi më 7 tetor 2023 pas një sulmi të Hamasit në Izrael që shkaktoi 1,200 viktima, ka marrë përmasa tragjike. Sipas autoriteteve palestineze, ofensiva izraelite ka vrarë mbi 47,500 palestinezë, mes tyre mijëra gra dhe fëmijë. Ushtria izraelite pretendon se nga këta, 17,000 janë militantë të Hamasit.
Propozimi i Trump për ndërhyrjen në Gaza mbetet i pasigurt, ndërsa komuniteti ndërkombëtar ndjek nga afër zhvillimet, duke vlerësuar ndikimin e mundshëm të këtij plani në stabilitetin e rajonit.
