Kryeministri Edi Rama ka njoftuar se do të nisë një format të ri komunikimi me qytetarët, duke zhvilluar dy biseda “live” çdo të martë dhe të enjte në mëngjes, përmes Instagramit.
Ky hap vjen si përgjigje ndaj ankesave të shumta të qytetarëve, të cilët kishin shprehur pakënaqësi për mungesën e përgjigjeve në rubrikën e tij të njohur “Sy m’Sy”.
Në një postim në Instagram, Rama shpjegoi se ky vendim erdhi si rezultat i kritikave që merrte në lidhje me postimet e tij, ku disa qytetarë pyetnin “po mua pse s’më përgjigjesh?” apo “pse u përgjigjesh vetëm atyre që shajnë?”. Ai theksoi se gjithashtu ka pasur shumë pyetje që lidhen me çështje të rëndësishme si vota e diasporës dhe procedurat për votim, ndaj mendoi se është koha për të krijuar një mundësi më të drejtpërdrejtë për komunikim.
“Meqë ka pasur pyetje të tilla dhe ka pasur gjithashtu shumë mesazhe që kërkojnë përgjigje, vendosa të nis një format më të drejtpërdrejtë për të diskutuar me qytetarët”, shkroi Rama. Ai njoftoi se biseda e parë live do të zhvillohet nesër në orën 08:30 në Instagram, duke i ftuar qytetarët të marrin pjesë dhe të shprehin pyetjet e tyre.
Ky format i ri do të lejojë qytetarët që të kenë mundësinë të komunikojnë më drejtpërdrejt me Kryeministrin, një mundësi që Rama shpreson të kontribuoni në një lidhje më të ngushtë me popullin dhe të ofrojë përgjigje të menjëhershme për çështje që shqetësojnë ata.
Kjo nismë është një hap tjetër nga ana e Kryeministrit për të përmirësuar transparencën dhe angazhimin me qytetarët, duke shfrytëzuar mundësitë e teknologjisë dhe rrjeteve sociale për një komunikim më të afërt dhe më të shpejtë.
