Një valë kritikash dhe reagimesh të ashpra kanë pushtuar mediat greke pas arratisjes së dy të burgosurve shqiptarë nga burgu i sigurisë së ulët të Kassavetias.
Lefter Toçi dhe Romeo Qosja, të dënuar me nga 20 vite burg për akuza të rënda si vrasje dhe grabitje me armë, u larguan nga një sektor i parrethuar i burgut, pavarësisht historikut të tyre kriminal dhe rrezikshmërisë së lartë.
“Si është e mundur që këta kriminelë të marrin pesë leje brenda vitit?” pyet një oficer policie për gazetën “Zougla”. Ai shton se dikush në sistem ka firmosur për lirimin e tyre të përkohshëm, duke mbajtur në këtë mënyrë një përgjegjësi të madhe. Oficeri vë në pikëpyetje edhe faktin se arratisja ndodhi vetëm 48 orë pasi ata ishin kthyer nga leja, duke aluduar se mund të ketë një planifikim më të gjerë kriminal në zhvillim.
Arratisja e dyshes ka ngjallur gjithashtu shqetësime për mundësinë e kthimit të tyre në Shqipëri. Policia greke nuk përjashton skenarin që ata të qëndrojnë për disa kohë në vendlindje para se të rifillojnë aktivitetet kriminale në Greqi.
E kaluara e errët e grupit kriminal
Romeo Qosja nga Cërriku dhe Lefter Toçi nga Bradasheshi i Elbasanit nuk janë emra të panjohur për autoritetet greke. Ata ishin pjesë e një grupi kriminal shqiptaro-grek që operonte me një rrezikshmëri të lartë, ku bënte pjesë edhe Alfons Ndoci. Ndoci, një emër famëkeq, u vra në qershor 2024 në burgun e Koridhalos pas përplasjes me të burgosur të tjerë.
Grupi akuzohej për disa vrasje të bujshme, mes të cilave ajo e një pronari dyqani në Elefsina dhe një gruaje të moshuar në Aspropirgos, si dhe për grabitje me armë. Mes veprimtarive të tyre kriminale, ata kishin kryer edhe djegien e një automjeti dhe të tjera krime që shkaktuan tronditje në opinionin publik grek.
Një historik i dënuarish që sfidojnë drejtësinë
Qosja dhe Toçi u arrestuan fillimisht në vitin 2016 së bashku me pesë shqiptarë të tjerë dhe një shtetas grek. Megjithatë, pas përfundimit të afatit të paraburgimit prej 18 muajsh, ata u liruan me masë sigurie dhe detyrim për paraqitje. Lirimi i tyre provizor rezultoi në shkelje të rregullave, pasi Toçi u arrestua për përpjekje për të dalë nga Greqia, por sërish u la i lirë. Një vit më vonë, ata kryen një tjetër grabitje brutale ndaj një familjeje greke.
Më në fund, në vitin 2019, të dy u arrestuan dhe u dënuan me 20 vite burg. Megjithatë, ata përfituan leje të shpeshta për sjellje të mirë, duke ngritur pikëpyetje mbi vendimet e sistemit të drejtësisë greke.
Kontrolle të rrepta pas arratisjes
Pas arratisjes së tyre, policia greke ka intensifikuar kontrollet në të gjithë vendin, duke fokusuar vëmendjen në kufijtë dhe zonat e ndjeshme. Burime nga policia deklarojnë se aksioni për kapjen e tyre është prioritet i lartë për të parandaluar ndonjë ngjarje të re kriminale.
Rasti i Qosjas dhe Toçit nënkupton jo vetëm një dështim të sistemit të drejtësisë greke, por edhe një paralajmërim për domosdoshmërinë e rishikimit të masave për trajtimin e kriminelëve të rrezikshëm.
