Të enjten, pak para mesnatës, sallën e Parlamentit e përshkuan duartrokitje të fuqishme. Mendja ta do se nën atë entuziazëm ishte miratuar ndonjë reformë madhore, diçka që do të ndihmonte qytetarët e thjeshtë.
Por realiteti ishte krejt ndryshe: në sallë po festohej miratimi i nismës për legalizimin e kanabisit. Pas kësaj, kryetarja e Kuvendit, me entuziazëm të pashoq, uronte qytetarët për festat e fundvitit. Një sesion parlamentar u mbyll, duke hapur rrugën për licencimin e drogës së legalizuar, të ashtuquajtur “mjekësore”.
Edi Rama nisi qeverisjen e tij me kanabis dhe po e përmbull gjithashtu me kanabis. Një cikël që ndoshta shënon fundin e tij politik, por me një trashëgimi që do të lërë pasoja të gjata. Kujtoj vitin 2015, kur si opozitar denoncova fuqishëm fenomenin e kanabizimit masiv. Qeveria e mohoi deri në pikën e fundit, por unë u detyrova të hyj vetë në parcela të rrezikshme, të ruajtura me armë. Kryeministri deklaronte se “çdo rrënjë ishte shkulur”, ndërsa realiteti tregonte një vend të kthyer në fidanishta narkoshteti.
Pasojat ishin të qarta: paratë e pista nga droga futeshin në ekonomi, shkatërronin konkurrencën dhe rritnin artificialisht çmimet. Ndërtesa luksoze ngriheshin mbi themele të paligjshme, duke larguar investimet e ndershme. Po aq tragjike ishin dhe pasojat sociale: përplasje, hakmarrje dhe ngjarje të përlyera me gjak. Qeveria, në vend që të luftonte fenomenin, humbi dy ministra të Brendshëm për lidhje me drogën. Dhe tani, kryeministri ka vendosur ta legalizojë me ligj, duke krijuar monopole të reja në duart e oligarkëve të tij.
Propaganda qeveritare
Ndërkaq, propaganda qeveritare nuk njeh kufij. Edi Rama, me vallet e tij politike në Bruksel, shpall hapjen e kapitujve të rinj me BE-në. Por po atë ditë kur ai fliste për arritje historike, mandarinat shqiptare u kthyen pas nga kufijtë e BE-së, të ndotura me pesticide të rrezikshme. Një dramë kjo për fermerët tanë, që shohin mundin e tyre të shpërfillur nga një qeveri që nuk i asiston e as i kontrollon.
Fermeri shqiptar éshtë braktisur. Ndihmat e premtuara nga BE-ja janë ndaluar pas shpërthimit të skandalit të shpërdorimit të 33 milion eurove të programit IPARD-II nga qeveria. Paratë e taksapaguesve europianë, që duhej të shkonin për fermerët, u përdorën për interesa klienteliste. Si mund të shpresojmë të eksportojmë mandarina cilësore apo produkte të tjera, kur qeveria nuk është në gjendje të sigurojë standardet bazike?
Nga qelia e burgut të Fierit, ku Salianji vuan dënimin, ironia është therëse.
Ja letra e plotë:
Letër nga qelia 6/Kanabisi kalon me duartrokitje, mandarinat kthehen në heshtje…
Të Enjten, pak para mesnatës disa duartrokitje qenkan degjuar në sallën e Parlamentit.
Mendja ta do se ligjvënësit do të kenë kaluar ndonjë reformë të fortë, ose një ligj për interes publik e në shërbim të qytetarëve.
Në fakt, sapo kishte marrë kartonat pro, nisma e qeverisë për legalizimin e kanabisit.
Pas kësaj, Kryetarja e Kuvendit në entuziazëm e sipër, paska uruar qytetarët për festat e fundvitit. U mbyll dhe ky sesiom parlamentar me sukses, duke hapur rrugën për licensën e shtrenjtë të drogës së ligjjshme, mjekësore.
Edi Rama e nisi qeverisjen me kanabis dhe po e mbyll me kanabis. Unë jam i bindur se ky është mandati i tij i fundit.
***
Kur në vitin 2015 bëra disa denoncime të cilat qeveria i mohonte u detyrova të hyja në parcela me hashash, në një atmosferë të rrezikshme pasi ruheshin me njerëz të armatosur, qeveria e mohonte përsëri!!
Kryeministri thoshte se kanë shkulur çdo rrënjë.
E vërtëta është se patëm një kanabizim masiv. Ngastrat ishin fidanishtja e narkoshtetit. Ata që u pasuruan me hashash, u futën në tregun e drogave të forta dhe në çdo anë të ekonomisë, duke prishur konkurencën dhe rritur artificialisht çmimet.
Sa herë qeveria mburret me rritjen e vlerës së pronës, ai nuk përmend faktorin kryesor, që është futja e parave të narko-trafikut në ndërtim.
Ato para të pista kanë sjellë vetëm dëm, dhe nga ana tjetër ngjarje, perplasje e hasmëri të përgjakshme me dhjetra të vrarë. Krime që vijojnë sot e kësaj dite.
Pra shajnia që pati lideri global se kanabizimi do sillte mrekulli ekonomike (sipas dëshmisë së ish zv.kryeministrit) ishte një marrëzi tragjike dhe kriminale.
Por Edi Rama nuk heq dorë. Ai humbi 2 ministra të brendshëm pikërisht për lidhjet me drogën e trafikun, dhe tani ka vendosur ta kultivojë me leje qeveritare, me liçensën që ai do ja japë fituesit të paracaktuar. Ky pra ngelet vizioni i tij dhe para këtyre zgjedhjeve.
***
Kryeministri hoqi vallen e preferuar në Bruksel, kur tha se kapituj të tjerë paska hapur Shqipëria me Komisionin Europian.
Propaganda që ecën shumë më shpejt se integrimi na e solli si arritje historike. Qeveria kalorsiake po çan rrugët e po shkel pengesat, e po na afron me familjen e madhe të kontinentit.
Po tamam atë ditë, doli një lajm që mandarinat tona ishin kthyer mbrapsht në kufinjtë e BE, pasi kishin pesticide dhe ishin të rrezikshme per shendetin.
Një dramë kjo për prodhimin vendas.
Të gjithë e dinë se ne do bëhemi pjesë e Unionit, kur të arrijmë disa standarte, e jo me llafe e kronika të gatshme nga arritjet e mëdha të Kryeministrit në Bruksel
Do të jemi pjesë e Unionit kur këtu fermeri të mos lihet në mëshirë të fatit, po kur ai të asistohet, e të kontrollohet si duhet, në mënyrë që mandarina e këtij vendi me tokë pjellore e të bekuar e me 300 ditë diell, të mos refuzohet.
Nëse nuk jemi në gjendje të eksportojmë këtë produkt që vjen nga asetet tona më të çmuara (e njëjta gjë ka ndodhur dhe me prodhime të tjera) atëherë çfarë do të çojmë ne në BE? Apo sërish kanabisin, kësaj radhe nën maskimin, mjekësor e industrial.
Këtu në burgun e Fierit, në këtë kohë kanabisi e mandarinash ka një ironi. Unë që kam denoncuar fenomenin kriminal dhe lidhjet e tij me ministrat e brendshëm, jam në muajin e tretë të dënimit.
Ndërsa nuk është këtu asnjë për dëmin e madh që u është bërë fermerëve tanë, me mohimin e mbi 100 milionë euro ndihmë nga programet e Komisionit Europian, për shkak se qeveria vendosi të fusë duart e të shpërdorojë 33 mln euro të programit të mëparshëm. 33 mln euro të taksapaguesve gjermanë, francezë, italianë, belgë, etj. Tek mbështetja që mund të vinte nga BE, me siguri mund të ishte dhe zgjidhja për pesticidet, që do t’i bënte mandarinat tona të sigurta. Por kjo nuk ndodhi, sepse rilindasit jo vetëm i morën për vete ato para, por ende nuk kanë reaguar si duhet pas skandalit për ta bindur Komisionin që të rihapë rrugën e Ipard-III.
Jam shumë kurioz të di se si do reagonte ky që hap kapitujt tanë me Brukselin, nëse aty do të pyetej, si ndodhi që qeveria juaj vodhi taksat tona që i kishim destinuar për fermerët tuaj të varfër?
Kështu pra, po shkurtojmë distancën, po afrohemi me propagandë të çmendur me Bashkimin Europian. Duke duartrokitur drogën, e duke heshtur për kthimin e mandarinave.
