Një aksident me pasojë vdekjen ka ndodhur mëngjesin e sotëm në aksin rrugor Levan–Tepelenë, pranë Rrethrrotullimit të Levanit.

Dy automjete, një “Audi” dhe një “Benz”, janë përplasur me njëri-tjetrin. Si pasojë e përplasjes së fortë, ka humbur jetën drejtuesi i “Audit”, shtetasi D. B., 55 vjeç.

Ndërkohë, tre pasagjerë që udhëtonin në “Audi” janë transportuar në spital dhe ndodhen jashtë rrezikut për jetën. Edhe drejtuesi i automjetit “Benz” është dërguar në spital dhe, sipas të dhënave paraprake, ndodhet jashtë rrezikut.

Trupi i viktimës është transportuar drejt morgut, ndërsa në vendngjarje ndodhen shërbimet e Policisë, të cilat po punojnë për dokumentimin e aksidentit dhe zbardhjen e plotë të rrethanave.

Paraprakisht dyshohet se shpejtësia tej normave të lejuara mund të ketë qenë një nga faktorët që ka shkaktuar përplasjen fatale, por dinamika e saktë dhe shkaqet e aksidentit do të përcaktohen nga hetimet e Policisë.