“RROGOZHINA ËSHTË E JONA” – BANORËT NË PROTESTË KUNDËR BASHKIMIT ME KAVAJËN

Për të tetën mbrëmje radhazi, banorët e Rrogozhinës kanë dalë në protestë kundër propozimeve për riorganizimin territorial, që parashikojnë bashkimin e Bashkisë Rrogozhinë me Bashkinë Kavajë.

Me pankarta dhe thirrje, qytetarët janë mbledhur në Parkun e Qytetit, nën sloganin “Rrogozhina është e jona”, duke kërkuar që qyteti të ruajë statusin e tij administrativ dhe të mos përfshihet në një ndarje të re territoriale.

Protestuesit kanë marrë fjalën njëri pas tjetrit në podiumin e improvizuar, ku kanë shprehur kundërshtimin e tyre ndaj propozimit. Ata argumentojnë se një bashkim me Kavajën nuk do të zgjidhte problematikat me të cilat përballet Rrogozhina.

Sipas banorëve, edhe Bashkia Kavajë ka problematikat dhe sfidat e saj dhe, për këtë arsye, një bashkim i dy territoreve nuk do të sillte përmirësimin e shërbimeve apo zgjidhjen e nevojave të komunitetit.

Për banorët, protesta nuk është vetëm një kundërshtim ndaj një propozimi administrativ, por një kërkesë për t’u dëgjuar përpara se të merret një vendim që, sipas tyre, prek drejtpërdrejt të ardhmen e qytetit dhe komunitetit.

Ata i kanë bërë thirrje autoriteteve që të marrin në konsideratë zërin e qytetarëve dhe argumentet e komunitetit përpara marrjes së një vendimi përfundimtar.

Protesta ka vijuar për tetë net radhazi dhe qytetarët deklarojnë se nuk do të ndalen.

Në përfundim të tubimit, protestuesit paralajmëruan se, nëse kërkesat e tyre nuk do të merren parasysh, do të vijojnë me forma të tjera reagimi kundër reformës së propozuar territoriale.

“Rrogozhina është e jona” mbetet slogani që shoqëron protestën e banorëve, të cilët kërkojnë që e ardhmja administrative e qytetit të vendoset duke marrë në konsideratë edhe vullnetin e komunitetit.