Pamjet që po shihni i përkasin pazarit të Fier-Sheganit, i cili zhvillohet çdo të enjte në aksin kryesor rrugor Lushnjë–Berat, në fshatin Fier-Shegan, njësia administrative Fier-Shegan, bashkia Lushnjë.

Ky treg është kthyer prej kohësh në një shqetësim serioz për drejtuesit e mjeteve. Aksi rrugor bëhet i rrezikshëm çdo të enjte, pasi tregtarë dhe qytetarë mblidhen në numër të madh, duke bllokuar qarkullimin. Situata rëndohet edhe më tej nga parkimi i mjeteve në të dy anët e rrugës, duke e kthyer këtë segment në një burim të vazhdueshëm aksidentesh.

Edhe pse kamera e TV Apollon e ka trajtuar shpesh këtë problematikë dhe pavarësisht ndërhyrjeve të herëpashershme të policisë bashkiake, situata mbetet e pandryshuar dhe shqetësuese.

Drejtuesit e mjeteve duhet të tregojnë kujdes të shtuar gjatë kalimit në këtë aks, pasi jo vetëm tregtarët kanë zaptuar hapësirat anësore, por edhe qytetarët lëvizin mes automjeteve, duke kaluar nga njëra anë e rrugës në tjetrën.