Të tjera zhvillime kanë dalë në dritë lidhur me operacionin që po zhvillohet këtë të shtunë në zonën e Ujit të Ftohtë në Vlorë, ku forcat speciale dhe strukturat e posaçme po kryejnë veprime për ekzekutimin e disa masave sigurie.

Sipas burimeve paraprake, hetimet janë mbështetur edhe në zbërthimin e komunikimeve në platformën Sky ECC, nga ku dyshohet se janë evidentuar episode të rënda kriminale, përfshirë një vrasje dhe veprimtari të lidhura me trafikun e drogës. Të njëjtat burime bëjnë me dije se ka persona të ndaluar edhe jashtë territorit të Shqipërisë.

Prokuroria e Posaçme ka firmosur shtatë urdhër-arreste në kuadër të këtij procedimi. Mes emrave për të cilët është lëshuar masë sigurie është edhe Flodian Plaku, i arrestuar më herët për vrasjen e Gentjan Bejtajt. Gjatë operacionit, forcat RENEA janë vënë në kërkim të Ervis Matodoshajt.

Burime nga Policia e Vlorës konfirmojnë se personat e dyshuar kanë qenë nën vëzhgim prej një periudhe të gjatë, ndërsa ndërhyrja e sotme synon finalizimin e veprimeve për kapjen e tyre. Autoritetet pritet të japin informacion zyrtar mbi rezultatet e operacionit në vijim.