Sulmet mes Shteteve të Bashkuara, Izraelit dhe Iranit kanë shkaktuar ndërprerjen më të madhe të trafikut ajror në rajon, duke çuar në anulimin e mbi 5 mijë fluturimeve brenda 24 orësh dhe duke lënë mijëra pasagjerë të bllokuar.

Hapësirat ajrore mbi disa vende të Lindjes së Mesme u mbyllën, ndërsa avionë që ishin tashmë në fluturim u detyruan të devijonin ose të ktheheshin në aeroportet e nisjes. Dubai dhe Doha, dy nga nyjet më të mëdha të trafikut ndërkontinental, ndaluan pothuajse plotësisht operacionet.

Më 28 shkurt, tre kompanitë kryesore të rajonit – Emirates, Qatar Airways dhe Etihad – menaxhonin njëkohësisht 94 avionë në ajër, me rreth 25 mijë pasagjerë në bord. Me mbylljen e hapësirave ajrore dhe aeroportet e bllokuara, operacionet u përballën me vështirësi të mëdha logjistike.

Të shtunën ishin planifikuar 4.218 fluturime drejt vendeve të Lindjes së Mesme, nga të cilat 966 u anuluan, rreth 23%. Duke përfshirë edhe nisjet, numri i anulimeve arriti në rreth 1.800, ndërsa 53 avionë që ndodheshin në ajër u devijuan drejt aeroporteve alternative.

Devijimet krijuan mbingarkesë edhe në aeroporte evropiane. Disa kompani njoftuan ekuipazhet për pamundësinë e përdorimit të aeroporteve alternative për shkak të kapacitetit të kufizuar.

Agjencia Evropiane për Sigurinë Ajrore rekomandoi që kompanitë të shmangin fluturimet mbi Lindjen e Mesme të paktën deri më 2 mars, ndërsa disa kompani, përfshirë Lufthansa, zgjatën ndalimin deri më 8 mars.

U regjistruan edhe raste të fluturimeve që u kthyen pas shumë orësh në ajër. Një fluturim nga Sydney drejt Dohas u devijua në Melbourne pas më shumë se dhjetë orësh, ndërsa një tjetër nga Filadelfia drejt Dohas u kthye në SHBA pasi kishte arritur mbi Mesdhe.

Sipas të dhënave, mbi 100 mijë pasagjerë mbetën të bllokuar vetëm më 28 shkurt në aeroportet e rajonit. Në mesditën e 1 marsit, rezultonin 3.500 fluturime të anuluara nga 4.329 të planifikuara në vendet e Lindjes së Mesme.

Trafiku ajror në rajon mbetet i kufizuar, ndërsa autoritetet dhe kompanitë ajrore po monitorojnë situatën për rifillimin gradual të operacioneve.