Presidenti Donald Trump fitoi zgjedhjet presidenciale të vitit 2024 pasi kundërshtari i tij fillestar, Joe Biden, u tërhoq nga gara për shkak të shqetësimeve lidhur me moshën dhe kthjelltësinë mendore.

Më shumë se një vit pas nisjes së mandatit të tij të dytë katërvjeçar, sondazhet tregojnë se një pjesë e konsiderueshme e amerikanëve janë të pakënaqur me performancën e Trump dhe shprehin shqetësime për kapacitetin e tij mendor.

Sipas një sondazhi të Reuters-Ipsos, 61% e amerikanëve ranë dakord me pohimin se Trump ka çrregullime që lidhen me moshën. Edhe 30% e republikanëve ndanë të njëjtin qëndrim.

Një tjetër tregues i publikuar në të njëjtin sondazh tregon rënie të përqindjes së atyre që e konsiderojnë Trump “mendërisht të mprehtë dhe të aftë për të përballuar sfidat”, nga 54% në shtator 2023 në 45% aktualisht.

Gjatë mandatit të parë të Trump, sondazhet e Universitetit Quinnipiac kishin regjistruar nivele të larta dyshimesh mbi qëndrueshmërinë e tij mendore, por përqindja e atyre që e konsideronin jo “mendërisht të qëndrueshëm” nuk arriti në 61%.

Megjithatë, situata e Trump mbetet ndryshe nga ajo e Biden, i cili në korrik 2024, muajin kur u tërhoq nga gara, kishte vetëm rreth një të katërtën e amerikanëve që e konsideronin mendërisht të mprehtë dhe të aftë për të përballuar sfidat.

Sondazhe të tjera, përfshirë një të realizuar nga CNN muajin e kaluar, tregojnë se përqindja e atyre që besojnë se Trump ka “qëndresën dhe mprehtësinë për të shërbyer në mënyrë efektive si president” ka rënë nga 53% në fund të vitit 2023 në 46% aktualisht.