Situatë alarmante në zonën e Librazhd, ku një rrëshqitje masive dheu ka vënë në rrezik serioz një shtyllë të linjës elektrike 110 kilovolt. Sipas burimeve lokale, lëvizja e tokës ka dëmtuar bazamentin e shtyllës, duke krijuar frikë për shembjen e saj dhe ndërprerje të mundshme të energjisë elektrike në disa zona.

Banorët shprehen të shqetësuar, pasi përveç rrezikut për furnizimin me energji, ekziston edhe mundësia e përshkallëzimit të situatës në rast reshjesh të dendura shiu, që mund të përkeqësojnë më tej stabilitetin e terrenit.

Autoritetet dhe grupet teknike pritet të inspektojnë nga afër zonën për të vlerësuar nivelin e rrezikut dhe për të ndërhyrë me masa emergjente për stabilizimin e shtyllës dhe të tokës përreth saj.

Ndërkohë, banorët kërkojnë reagim të menjëhershëm për të shmangur pasoja më të rënda, si shembja e strukturës apo ndërprerje afatgjata të energjisë elektrike në zonë.