Producentja izraelite Dana Eden, 52 vjeç, është gjetur e vdekur në një dhomë hoteli në Athinë, ku ndodhej për xhirimet e sezonit të katërt të serialit të spiunazhit “Teheran”.

Sipas policisë greke, ajo u zbulua mbrëmjen e së dielës nga vëllai i saj. Autoritetet ia atribuuan vdekjen vetëvrasjes. Në raste të tilla, kryhet automatikisht autopsi, ndërsa hetimi zyrtar vijon.

Policia nisi menjëherë marrjen e dëshmive nga stafi i hotelit dhe sekuestrimin e pamjeve të kamerave të sigurisë. Një zëdhënëse e policisë, Constantina Dimoglidou, deklaroi se vëllai i producentes kishte treguar se ajo merrte ilaçe dhe se më herët kishte qenë e shtruar në spital, duke lënë të kuptohet se nuk kishte indicie për akt të paligjshëm.

Pas raportimeve në media për një lidhje të mundshme me Iranin, kompania e saj, Donna and Shula Productions, përjashtoi kategorikisht çdo lidhje me krim apo motiv nacionalist, duke i cilësuar thashethemet si të pavërteta.

Dana Eden ishte një figurë e njohur në industrinë televizive të Izraelit dhe kishte fituar çmimin Emmy për prodhimin e serialit të Apple TV “Teheran”. Ajo ndodhej në Athinë që prej 4 shkurtit për xhirimet e sezonit të ri.

Transmetuesi publik izraelit KAN, me të cilin Eden kishte bashkëpunuar në disa projekte, shprehu trishtim për ndarjen nga jeta të saj, duke e cilësuar një figurë qendrore në prodhimet më të rëndësishme të televizionit izraelit.

Seriali “Teheran”, me protagoniste Niv Sultan në rolin e agjentes së Mossadit Tamar Rabinyan, trajton infiltrimin e një spiuneje në Iran për të çmontuar programin bërthamor të vendit. Seriali është kritikuar nga regjimi iranian si propagandë izraelite.

Që nga fillimi, seriali është xhiruar në Athinë, për shkak të ngjashmërisë urbane me kryeqytetin iranian.

KAN theksoi se trashëgimia profesionale e Dana Eden do të vazhdojë të ndikojë industrinë televizive izraelite.