Dy propozime fiskale të opozitës u rrëzuan në Komisionin e Ekonomisë, pas debateve të forta mes deputetëve dhe përfaqësuesve të qeverisë. Bëhet fjalë për heqjen e akcizës për birrën artizanale dhe uljen e TVSH-së në 5% për produktet ushqimore.
Deputetja e Partisë Demokratike, Jorida Tabaku, kërkoi që prodhuesit e vegjël të birrës artizanale të mos trajtohen njësoj si prodhuesit e mëdhenj. Ajo argumentoi se në Shqipëri operojnë vetëm 9 birrari artizanale, me një prodhim total prej 3.895 hektolitrash, ndërkohë që paguajnë të njëjtën akcizë si kompanitë e mëdha.
Tabaku kërkoi rikthimin e regjimit të diferencuar të akcizës, me tavan maksimal prodhimi 5.000 hektolitra, duke theksuar se birra artizanale është produkt turistik dhe pjesë e identitetit vendas. Propozimi u rrëzua nga mazhoranca, ndërsa u mbështet vetëm nga deputeti socialist Erion Braçe.
Zëvendësministri i Financave, Endrit Yzeiraj, deklaroi se aplikimi i akcizës me dy nivele ka krijuar probleme serioze në të kaluarën dhe se qeveria nuk e mbështet rikthimin e këtij modeli.
Nga ana tjetër, deputeti Erion Braçe e cilësoi trajtimin e deritanishëm të akcizës së birrës si produkt të korrupsionit dhe klientelizmit, duke akuzuar administratën se ka mbyllur sytë ndaj prodhuesve që tejkalonin kufijtë ligjorë të prodhimit.
Në të njëjtën mbledhje u rrëzua edhe propozimi i Partisë së Lirisë për uljen e TVSH-së nga 20% në 5% për produktet ushqimore. Deputeti Tedi Blushi e cilësoi nismën si akt social dhe moral përballë rritjes së kostos së jetesës.
Mazhoranca ngriti dyshime mbi efektin real të uljes së TVSH-së për konsumatorët, ndërsa Erion Braçe argumentoi se një TVSH e ulët do të përfitonte edhe shtresat me të ardhura të larta.
Zëvendësministri Yzeiraj paralajmëroi se brenda vitit do të rishikohen tërësisht ligjet për TVSH-në dhe akcizat, duke sinjalizuar eliminimin e disa përjashtimeve tatimore dhe orientimin e ndihmës përmes mekanizmave të tjerë socialë.
Të dy projektligjet janë dërguar për opinion pranë qeverisë dhe vendimi përfundimtar do të merret në seancë plenare të Kuvendit.
