Një gjykatë amerikane ka dënuar me burgim të përjetshëm 59-vjeçarin Ryan Routh, autorin e atentatit të dështuar ndaj Presidentit Donald Trump në vitin 2024, gjatë një ngjarjeje të ndodhur në një fushë golfi në Florida.

Routh u shpall fajtor për tentativë vrasjeje ndaj Donald Trump, i cili në atë periudhë ishte ende kandidat për president. Ngjarja ndodhi në shtator 2024, në ambientet e Klubit Ndërkombëtar të Golfit Trump në West Palm Beach, ku shërbimet e sigurisë ndërhynë në kohë duke parandaluar sulmin.

Sipas të dhënave zyrtare nga procesi gjyqësor, një agjent i Shërbimit Sekret vuri re tytën e një arme që dilte nga shkurret pranë zonës ku ndodhej Trump. Agjenti qëlloi drejt autorit, i cili u largua nga vendngjarja, por u arrestua pak më vonë në afërsi të zonës.

Në vendimin e saj, gjyqtarja Aileen Cannon vlerësoi se veprimet e Routh përbënin një rrezik ekstrem për sigurinë publike dhe institucionet demokratike, duke theksuar se ai kishte planifikuar për muaj të tërë atentatin dhe kishte treguar gatishmëri për të vrarë këdo që do t’i dilte përpara. Gjykata theksoi gjithashtu se i dënuari nuk ka shprehur asnjë pendesë për veprimet e tij.

Gjatë procesit gjyqësor, Routh u deklarua i pafajshëm dhe vendosi të përfaqësonte veten. Seancat u shoqëruan me sjellje të çrregullta nga ana e tij, përfshirë deklarata provokuese dhe episode të tensionuara në sallën e gjyqit. Pas shpalljes së vendimit të fajësisë nga juria, ai tentoi të dëmtonte veten përpara se të nxirrej nga salla nga oficerët e sigurisë.

Ryan Routh, i lindur në Karolinën e Veriut dhe banues më parë në Havai, u cilësua nga gjykata si autor i një akti të rëndë kriminal që synonte drejtpërdrejt jetën e një figure kyçe politike. Incidenti në Florida ishte atentati i dytë ndaj Donald Trump gjatë vitit 2024, pas një tjetër sulmi të ndodhur gjatë një tubimi elektoral në Pensilvani.

Vendimi për burgim të përjetshëm mbyll një nga çështjet më të rënda penale të viteve të fundit në SHBA, duke rikthyer në vëmendje nivelin e lartë të kërcënimeve ndaj figurave politike dhe masat e sigurisë në periudha zgjedhore.