Kreu i grupit parlamentar të Partisë Socialiste, Taulant Balla, ka reaguar pas ndërprerjes së fjalës së kryetarit të Partisë Demokratike, Sali Berisha, gjatë një seance në Asamblenë Parlamentare të Këshillit të Evropës.

Balla ka publikuar një video nga seanca, ku drejtuesja i fik mikrofonin Berishës ndërsa ai po fliste, duke akuzuar se Shqipëria është kthyer në një “narkoshtet”.

Në postimin e tij, Balla shkruan se Berisha është mësuar në Kuvendin e Shqipërisë të flasë pa kufizim kohe, ndërsa në Këshillin e Evropës rregullat janë strikte dhe koha e fjalës është e kufizuar.

“Bufi është mësuar që përroin psiqik ta zbrazë për minuta pafund në foltoren e Kuvendit. Ndërkohë që në Asamblenë Parlamentare apo parlamentet e Europës koha është 1–2 minuta. Shikojeni si ja ndërpret fjalën drejtuesja e seancës,” shkruan Balla.

Ai shton se këto rregulla duhet të zbatohen edhe në Kuvendin e Shqipërisë.

“Është koha që këto rregulla t’i kemi edhe në Kuvend. E paimagjinueshme në Europë diskutime 10 minuta,” vijon postimi.

Në reagimin e tij, Balla përmend gjithashtu faktin se, sipas tij, Berisha ka shkuar në Asamblenë Parlamentare të Këshillit të Evropës duke zënë vendin e deputetes Albana Vokshi.

“Nuk po komentoj edhe faktin që ka shkuar atje fshehurazi,” shkruan Balla.