Një stuhi e fuqishme dimërore ka përfshirë Shtetet e Bashkuara, duke shkaktuar të paktën shtatë viktima dhe ndërprerje masive të energjisë elektrike për qindra mijëra familje. Kushtet e rrezikshme atmosferike janë shtrirë nga Teksasi deri në Nju Ingland, duke sjellë mbyllje shkollash, bllokime rrugësh dhe anulime fluturimesh.

Sipas të dhënave zyrtare, dy persona kanë humbur jetën nga hipotermia në Luiziana, ndërsa viktima të tjera të lidhura me motin e ashpër janë raportuar në Teksas, Tenesi dhe Kansas. Deri pasditen e së dielës, mbi 800 mijë familje kanë mbetur pa energji elektrike, ndërsa më shumë se 11 mijë fluturime janë anuluar.

Stuhia është shoqëruar me reshje të dendura dëbore, shi të ngrirë dhe akull, duke krijuar kushte të rrezikshme që pritet të zgjasin për disa ditë. Autoritetet paralajmërojnë se rreth 180 milionë qytetarë, më shumë se gjysma e popullsisë së SHBA-së, mund të preken nga kjo valë e ftohti ekstrem.

Zyrtarë dhe ekspertë të motit kanë theksuar se shkrirja e dëborës dhe akullit do të jetë e ngadaltë, çka do të vështirësojë përpjekjet për rikuperim. Në disa shtete janë raportuar qindra aksidente rrugore, ndërsa rreziku nga rënia e pemëve dhe linjave elektrike mbetet i lartë.

Në disa rajone janë shpallur gjendje emergjence, ndërsa Senati amerikan ka anuluar një seancë të planifikuar për shkak të situatës. Autoritetet u kanë bërë thirrje qytetarëve të shmangin lëvizjet e panevojshme dhe të ndjekin udhëzimet e sigurisë.