Qyteti i Vlorës përkujtoi këtë të shtunë 182-vjetorin e lindjes së Ismail Qemalit, me homazhe të zhvilluara te varri monumental i themeluesit të shtetit shqiptar.

Në ceremoninë përkujtimore morën pjesë ministri i Mbrojtjes, Pirro Vëngu, deputeti Ardit Bido, prefektja Evis Allushi dhe kryetarja e Bashkisë së Vlorës, Bruna Mersini, si dhe përfaqësues të institucioneve vendore. Gjatë homazheve u vendosën kurora me lule, ndërsa banda frymore interpretoi Himnin e Flamurit.

Në fjalimet e mbajtura, përfaqësuesit e qeverisë dhe të pushtetit vendor vlerësuan kontributin e Ismail Qemalit si shtetformuesi i parë i Shqipërisë dhe theksuan rëndësinë e ruajtjes së kujtesës historike për figurën e tij.

Ismail Qemali lindi më 24 janar 1844 në Vlorë. Për datën e vdekjes, në pllakën e varrit shënohet 24 janar 1919, por studiuesi Evarist Beqiri, duke iu referuar dokumenteve arkivore, pohon se Ismail Qemali ka ndërruar jetë më 26 janar 1919 në Peruxhia të Italisë.