Këto pamje që shihni i përkasin prodhimeve në sera në zonat e përmbytura disa ditë më parë, ku i gjithë mundi, puna dhe djersa e derdhur për muaj të tërë u shkatërruan brenda pak orësh. Si pasojë e reshjeve të shumta dhe daljes së lumenjve nga shtrati, uji pushtoi serat, duke dëmtuar rëndë prodhimet bujqësore dhe infrastrukturën e agrofarmave.

Fermerët e fshatrave të prekur janë përballur me humbje të mëdha ekonomike, pasi investimet e tyre janë zhdukur brenda një kohe shumë të shkurtër. Për ta, kjo nuk është vetëm humbje prodhimi, por edhe goditje e drejtpërdrejtë në të ardhurat familjare dhe në vazhdimësinë e punës së tyre.

Aktualisht, fermerët presin ndërhyrjen e shtetit për vlerësimin e dëmeve dhe për sigurimin e dëmshpërblimeve, në mënyrë që të mund të rifillojnë punën dhe të përballojnë pasojat e përmbytjeve. Ata kërkojnë mbështetje institucionale, pasi pa ndihmë financiare rikuperimi i këtyre dëmeve mbetet i vështirë.

Përmbytjet e fundit nxjerrin edhe një herë në pah nevojën për masa parandaluese, mirëmbajtjen e shtretërve të lumenjve dhe mbështetje më të fortë për sektorin bujqësor, i cili mbetet ndër më të prekurit nga fenomenet natyrore.