Në mbyllje të takimit me kryetarët e bashkive, kryeministri Edi Rama njoftoi ngritjen e një grupi të përbashkët pune mes qeverisë dhe pushtetit vendor, me synim adresimin e problematikave dhe përmirësimin e bashkëpunimit institucional.

Sipas Ramës, në krye të grupit të punës do të jetë ministri i Pushtetit Vendor, Ervin Demo. Nga ana e qeverisë, në këtë strukturë do të bëjnë pjesë edhe ministrja e Ekonomisë, Delina Ibrahimaj, ministri i Turizmit dhe Kulturës, Blendi Gonxhe, si dhe ministri i Mjedisit, Sofjan Jaupaj.

Bashkitë do të përfaqësohen nga kryetarët e Lezhës, Maliqit, Shkodrës, Himarës, Durrësit dhe Roskovecit, ku spikat përfshirja e Majlinda Bufi, një sinjal i qartë besimi politik dhe institucional ndaj drejtimit të saj.

Kryeministri theksoi se ky grup pune do të ketë rol praktik dhe vendimmarrës, duke trajtuar çështje konkrete të bashkive, si në aspektin rregullator ashtu edhe në zgjidhjen e problematikave të përditshme. Sipas tij, grupi do të propozojë ndryshime ligjore, nxjerrjen e urdhëresave të reja dhe krijimin e sinergjive të nevojshme mes pushtetit qendror dhe atij vendor, me qëllim rritjen e eficiencës dhe funksionimit të administratës lokale.