Debati mbi ngjarjen e ndodhur në Fier, që përfshin shtetasin Altin Meçaj dhe familjen e një efektivi policie, vijon të shoqërohet me deklarata të forta dhe versione të kundërta lidhur me mesazhet private (SMS) të publikuara së fundmi.

Pas reagimit të motrës së policit Fredi Lamaj, e cila bëri publike disa mesazhe duke i cilësuar ato si ngacmim dhe përndjekje, ka ardhur një tjetër reagim nga familjarët e Altin Meçajt, të cilët i hedhin poshtë këto pretendime dhe flasin për manipulim të provave.

Në një mesazh të dërguar më 17 janar 2026, motra e Altin Meçajt shprehet se familja e saj kërkon që rasti të bëhet sërish publik, duke theksuar se mesazhet e publikuara nga vajza e quajtur Fize Lamaj nuk janë të vërteta dhe se, sipas saj, bëhet fjalë për manipulime.

Ajo deklaron se vëllai i saj është i dëmtuari në këtë histori dhe se kërkon ndihmë nga shteti për zbardhjen e plotë të ngjarjes. Sipas saj, nëse mesazhet do të ishin reale dhe të vërteta, familja e Altin Meçajt nuk do të kishte asnjë interes që çështja të bëhej publike dhe të rihapej në opinionin publik.

“Unë jam motra e të dëmtuarit Altin Meçaj dhe dua ta bëj sërish publike këtë rast, për faktin se SMS-të që kanë dalë në media nga vajza e quajtur Fize Lamaj janë manipulime dhe nuk janë të vërteta. Vëllai im kërkon ndihmë nga shteti. Nëse këto mesazhe do të ishin të vërteta, ne nuk do të këmbëngulnim që rasti të bëhej publik”, shprehet ajo.

Sipas familjarëve, vetë Altin Meçaj vijon të qëndrojë fort pas deklaratës së tij se nuk i ka shkruar mesazhe vajzës në fjalë dhe se gjithë pretendimet ndaj tij janë të pavërteta. Ata kërkojnë që rasti të trajtohet nga institucionet dhe të sqarohet përmes hetimeve zyrtare, larg presionit mediatik dhe publikimeve selektive.

Ngjarja ka sjellë një përplasje të hapur mes dy palëve, me akuza të ndërsjella për dhunë, përndjekje dhe manipulim provash, ndërsa ende nuk ka një qëndrim përfundimtar nga institucionet përgjegjëse.

Familja e Altin Meçajt kërkon që autoritetet shtetërore të ndërhyjnë për të garantuar zbardhjen e plotë të së vërtetës dhe për të vlerësuar ligjërisht vërtetësinë e mesazheve që janë bërë publike, duke theksuar se vetëm një hetim i paanshëm mund të japë përgjigje përfundimtare mbi këtë çështje.