FIFA po përgatit risi teknologjike për Kupën e Botës 2026, duke planifikuar përdorimin e inteligjencës artificiale për të përmirësuar zbulimin gjysmëautomatik të pozicioneve jashtë loje, me synim rritjen e saktësisë dhe shkurtimin e kohës së vendimmarrjes.

Sipas planit të prezantuar nga presidenti i FIFA-s, Gianni Infantino, në bashkëpunim me kompaninë Lenovo, sistemi i ri do të bazohet në avatarë 3D të gjeneruar nga inteligjenca artificiale, të integruar në teknologjinë e jashtë loje. Të gjithë lojtarët pjesëmarrës do t’i nënshtrohen një skanimi digjital me saktësi të lartë, një proces që zgjat rreth një sekondë dhe krijon modele 3D shumë të detajuara të pjesëve të trupit.

Falë këtij sistemi, lëvizjet e lojtarëve do të identifikohen edhe në raste kur pamja është pjesërisht e penguar ose kur ka ndryshime të papritura në këndet e shikimit. Kjo pritet të reduktojë ndjeshëm gabimet dhe të përshpejtojë vendimet e marra nga sistemi VAR, veçanërisht në rastet e diskutueshme të pozicionit jashtë loje.

Një tjetër element i rëndësishëm është fakti se avatarët 3D do të transmetohen drejtpërdrejt në prodhimet zyrtare televizive, duke ofruar pamje më të qarta dhe duke reduktuar paqartësitë për publikun. Sistemi është testuar tashmë gjatë Kupës Ndërkontinentale.

Përveç kësaj risi, FIFA ka njoftuar se do të prezantojë edhe platformën “Football AI Pro”, e cila do të mbështesë ekipet kombëtare në analizimin e të dhënave dhe përgatitjen taktike para dhe pas ndeshjeve. Paralelisht, do të vijë edhe një përditësim i “Referee View”, që synon të ofrojë pamje më të buta dhe më të qarta gjatë transmetimeve.

Këto zhvillime shënojnë një hap të ri drejt përdorimit të avancuar të teknologjisë në futbollin ndërkombëtar, me synimin për të rritur transparencën dhe besueshmërinë e vendimeve arbitrare.