Protestat masive që kanë përfshirë Iranin prej disa ditësh kanë shkaktuar një bilanc të rëndë në njerëz, me dhjetëra viktima, të plagosur dhe mijëra të arrestuar.

Sipas të dhënave të publikuara nga Agjencia e Lajmeve të Aktivistëve të të Drejtave të Njeriut (HRANA), në dhjetë ditët e fundit janë vrarë 36 persona gjatë përleshjeve të lidhura me protestat në mbarë vendin. Prej tyre, 34 viktima ishin protestues, ndërsa dy ishin të lidhura me forcat e sigurisë.

Autoritetet iraniane nuk kanë publikuar një shifër zyrtare për viktimat civile, por kanë konfirmuar se tre pjesëtarë të forcave të sigurisë kanë humbur jetën gjatë trazirave.

HRANA raporton gjithashtu se mbi 60 protestues janë plagosur, ndërsa 2,076 persona janë arrestuar nga forcat e rendit që nga fillimi i protestave.

Në ditën e dhjetë të protestave, është raportuar se forcat e sigurisë përdorën gaz lotsjellës pranë një spitali në qendër të Teheranit, gjatë përleshjeve me protestuesit.

Protestat janë nxitur nga kriza ekonomike dhe janë përhapur në 27 nga 31 provincat e Iranit, duke shkaktuar tensione dhe ndërprerje të jetës normale në qytete të shumta.