Presidenti amerikan Donald Trump ka riafirmuar se Shtetet e Bashkuara do të drejtojnë Venezuelën pas kapjes së Nicolás Maduro, duke deklaruar se liderja e opozitës, María Corina Machado, nuk është në gjendje të marrë drejtimin e vendit.

Në deklaratat e tij për mediat, Trump u shpreh se Machado nuk gëzon mbështetje dhe respekt të mjaftueshëm brenda Venezuelës për të ushtruar rol udhëheqës.

“Mendoj se do të ishte shumë e vështirë për të të ishte udhëheqëse. Ajo nuk ka mbështetjen brenda vendit ose respektin brenda vendit. Është një grua shumë e mirë, por nuk ka respektin për të qenë udhëheqëse”, tha Trump.

Ai konfirmoi gjithashtu se nuk ka pasur asnjë kontakt me Machadon që nga kapja e Maduros.

I pyetur se kush do të marrë drejtimin e Venezuelës në këtë fazë, presidenti amerikan bëri shenjë drejt vetes dhe Sekretarit të Shtetit Marco Rubio, duke deklaruar se “për një periudhë kohore” drejtimi do të jetë në duart e njerëzve që, sipas tij, qëndrojnë menjëherë pas tij.

Deklaratat e Trump vijnë në vijim të qëndrimeve të tij për administrimin e përkohshëm të Venezuelës nga Shtetet e Bashkuara pas zhvillimeve të fundit politike dhe ushtarake në vend.