Zhvillime të reja po dalin në dritë lidhur me operacionin e fshehtë që përfundoi me kapjen e presidentit venezuelian Nicolás Maduro nga forcat amerikane, duke hedhur dritë mbi rolin vendimtar të shërbimeve të inteligjencës.

Sipas raportimeve, një burim i inteligjencës amerikane i pozicionuar brenda qeverisë venezueliane ka monitoruar nga afër lëvizjet e Madurós, duke mundësuar identifikimin e saktë të vendndodhjes së tij në momentet kritike para arrestimit.

Operacioni dyshohet se është mbështetur në një kombinim të monitorimit ajror përmes dronëve të teknologjisë së avancuar dhe informacioneve të siguruara nga burime në terren, duke garantuar një ndjekje pothuajse të vazhdueshme të presidentit venezuelian.

Sipas të dhënave të publikuara, presidenti amerikan Donald Trump kishte miratuar që në muajt e mëparshëm një strategji më të ashpër ndaj Venezuelës, përfshirë autorizimin për planifikimin dhe përgatitjen e operacioneve të shumta.

Në këtë kuadër, në fund të dhjetorit është raportuar edhe një goditje ajrore ndaj një moli që, sipas autoriteteve amerikane, përdorej për aktivitete të trafikut të drogës.

Burime të afërta me hetimin e kanë cilësuar kapjen e Madurós si kulmin e një bashkëpunimi të ngushtë mes shërbimeve të inteligjencës dhe forcave të armatosura, pas një procesi të gjatë planifikimi.

Mbetet e paqartë mënyra e rekrutimit të burimit venezuelian, por ish-zyrtarë amerikanë kanë vënë në dukje se shpërblimi prej 50 milionë dollarësh për informacione që çojnë në kapjen e Madurós mund të ketë qenë një faktor nxitës në sigurimin e këtij bashkëpunimi.