Një aksident i rëndë ka tronditur paraditen e sotme aksin rrugor Lezhë–Shkodër, ku një përplasje e fortë mes dy automjeteve ka lënë pas dy persona të vdekur dhe katër të plagosur.

Ngjarja ka ndodhur në afërsi të fshatit Gocaj. Si pasojë e përplasjes, mjetet janë dëmtuar rëndë, ndërsa për nxjerrjen e personave nga automjetet është dashur ndërhyrja e forcave zjarrfikëse.

Katër persona kanë mbetur të plagosur dhe janë dërguar me urgjencë në spital për trajtim mjekësor. Mes tyre raportohen edhe dy fëmijë, ndërsa gjendja e tyre po vlerësohet nga mjekët.

Në vendngjarje ndodhen shërbimet e Policisë dhe grupi hetimor, të cilët po punojnë për zbardhjen e plotë të rrethanave të aksidentit dhe përcaktimin e shkakut të përplasjes.

Autoritetet kanë apeluar për kujdes të shtuar në qarkullim, ndërsa hetimet për këtë ngjarje të rëndë vijojnë.