Një ngjarje e rëndë është regjistruar në qytetin e Korçës, ku një e moshuar 84-vjeçare është gjetur pa shenja jete në banesën e saj në lagjen nr. 12. E moshuara jetonte e vetme dhe prej disa orësh nuk kishte dhënë asnjë shenjë kontakti.

Fqinjët, të shqetësuar nga mungesa e përgjigjes, kanë njoftuar shërbimet e policisë. Në bashkëpunim me zjarrfikëset, u bë hapja e derës së banesës, ku u konstatuan shenjat e vdekjes së të moshuarës.

Sipas informacioneve paraprake, nuk ka indicie për ndërhyrje të dhunshme, ndërsa policia po kryen të gjitha veprimet e nevojshme për të përcaktuar shkaqet e ndarjes nga jeta.

Ngjarja vjen në një kontekst shqetësues, pasi raste të ngjashme janë shënuar edhe më parë në Korçë, ku të moshuar që jetojnë të vetmuar janë gjetur të pajetë në banesat e tyre, duke nxjerrë në pah nevojën për kujdes dhe monitorim më të madh social.