Shtetet e Bashkuara kanë kryer sulme ajrore kundër militantëve të lidhur me grupin Shteti Islamik në veriperëndim të Nigerisë, duke goditur kampe të tyre në shtetin Sokoto, pranë kufirit me Nigerin. Sulmet u zhvilluan të enjten në mbrëmje dhe, sipas autoriteteve amerikane dhe nigeriane, kanë shkaktuar viktima në radhët e militantëve.

Ushtria amerikane bëri të ditur se një vlerësim paraprak tregon për “shumë të vrarë”, ndërsa numri i saktë i viktimave mbetet ende i paqartë. Një zyrtar lokal në zonën Tangaza të shtetit Sokoto konfirmoi se sulmet goditën disa kampe të grupit të njohur në vend si “Lakurawa”, duke shtuar se shumë luftëtarë u vranë dhe se një pjesë e tyre u panë duke u larguar drejt territorit të Nigerit.

Presidenti i Shteteve të Bashkuara, Donald Trump, deklaroi se sulmet e kryera ditën e Krishtlindjes ishin “vdekjeprurëse” dhe e cilësoi grupin si terrorist, duke pohuar se ai kishte kryer sulme brutale ndaj civilëve. Ndërkohë, Ministri i Jashtëm i Nigerisë, Yusuf Maitama Tuggar, theksoi se operacioni ishte i përbashkët dhe nuk kishte lidhje me përkatësi fetare. Ai sqaroi se sulmet ishin planifikuar prej kohësh, mbi bazën e informacionit të siguruar nga autoritetet nigeriane, dhe nuk përjashtoi mundësinë e veprimeve të tjera të ngjashme.

Sipas Ministrisë së Informacionit të Nigerisë, operacioni u zhvillua me miratimin e drejtpërdrejtë të Presidentit Bola Tinubu dhe me përfshirjen e plotë të forcave të armatosura nigeriane. Autoritetet njoftuan gjithashtu se mbetje nga municionet ranë në dy komunitete, në fshatin Jabo në Sokoto dhe në Offa, në shtetin Kwara, rreth 600 kilometra në jug, por nuk raportohet për viktima civile.

Një banor i zonës së Jabo-s deklaroi se kishte parë diçka të ngjashme me një avion që u përplas në fusha, duke shtuar se në atë zonë nuk kishte pasur më parë probleme me militantë dhe se komuniteti jeton në paqe.

Autoritetet nigeriane prej vitesh po përballen me grupe të ndryshme xhihadiste, përfshirë Boko Haram dhe fraksione të lidhura me Shtetin Islamik, kryesisht në verilindje të vendit. Së fundmi, grupi Lakurawa ka tentuar të krijojë një bazë në veriperëndim, në shtetin Sokoto, duke shfrytëzuar zonat kufitare dhe duke rekrutuar të rinj në komunitete të izoluara.

Nigeria, vendi më i populluar i Afrikës me rreth 220 milionë banorë, vazhdon të përballet me pasojat e dhunës së grupeve ekstremiste, të cilat për më shumë se një dekadë kanë shkaktuar mijëra viktima dhe zhvendosje masive të popullsisë.