Gjykata e Posaçme në Tiranë zhvillon sot një tjetër seancë gjyqësore për çështjen Partizani, një dosje e cila përfshin ish kryeministrin Sali Berisha, dhëndrin e tij Jamarbër Malltezi dhe tre të pandehur të tjerë. Seanca është caktuar të fillojë në orën dymbëdhjetë e tridhjetë.

Seanca e mëparshme u shty për shkak të mungesës së mbrojtësve të biznesmenit Fatmir Bektashi dhe dy kompanive të përfshira në dosje. Pak kohë para kësaj, gjykata kishte refuzuar kërkesën e Berishës dhe të bashkëpandehurve që pretendonin pavlefshmëri të akteve të mbledhura në hetim, duke e cilësuar kërkesën të pambështetur në ligj dhe në prova. Kjo kërkesë lidhej me aktet e firmosura nga gjyqtarja e hetimit paraprak, Irena Gjoka, e cila ka qenë shpesh në shënjestër të sulmeve politike nga ana e Berishës.

Procesi gjyqësor ndaj Berishës, i formalizuar më nëntëmbëdhjetë maj, bazohet në akuzën për korrupsion pasiv të zyrtarëve të lartë. Sipas SPAK, Berisha ka përdorur pozicionin e tij si kryeministër për të miratuar akte që kanë sjellë përfitime drejtpërdrejta për dhëndrin e tij.

Jamarbër Malltezi akuzohet për korrupsion dhe pastrim parash. Sipas organit të akuzës, Malltezi ka përfituar rreth pesë pikë katër milionë euro nga një projekt ndërtimi, duke u favorizuar nga vendime të qeverisë të firmosura gjatë kohës kur Berisha drejtonte ekzekutivin.

Fatmir Bektashi, ortak i Malltezit në këtë projekt, akuzohet gjithashtu për korrupsion dhe pastrim parash. Për pastrim parash do të përgjigjen edhe Xhimi Begeja, trashëgimtar i truallit ku është zhvilluar ndërtimi, si edhe Andia Pustina, përgjegjëse për financat dhe dokumentacionin juridik të kompanisë Homeplan. Po në këtë proces do të gjykohen edhe tre kompani, Kontakt, Homeplan dhe Studio Pustina, të cilat akuzohen për pastrim parash.