Një shëtitje e zakonshme është kthyer në një moment paniku këtë të diel në bulevardin “Ismail Qemali”, ku një grua rreth 35 vjeçe është rrëzuar pasi është penguar në një bllok betoni të vendosur përgjatë trotuarit.
Sipas të dhënave, gruaja ka pësuar dëmtime në kokë si pasojë e rrëzimit dhe është transportuar me urgjencë në spital për të marrë ndihmë mjekësore. Gjendja e saj shëndetësore po monitorohet nga mjekët.
Banorët e zonës kanë shprehur shqetësimin e tyre për rrezikun që, sipas tyre, paraqesin blloqet e betonit të vendosura pa kriter përgjatë trotuareve, duke theksuar se këto pengesa janë veçanërisht të rrezikshme për këmbësorët dhe për personat e moshuar.
Sipas tyre, vetëm disa javë më parë, një grua 65 vjeçe humbi jetën në rrethana të ngjashme, çka ka shtuar thirrjet për ndërhyrje dhe marrjen e masave për garantimin e sigurisë së këmbësorëve. Autoritetet pritet të verifikojnë rrethanat e ngjarjes.
