Policia e Shtetit ka bërë me dije detaje të reja lidhur me plagosjen me armë zjarri të Fabin Kuçit, 33 vjeç, personazh i njohur në rrjetet sociale si “Gucci”. Ngjarja ndodhi më 15 dhjetor, rreth orës 23:45, pranë një lokali në lagjen nr. 9 të Durrësit.
Sipas hetimeve paraprake, tre persona janë afruar me dy automjete në vendin ku ndodhej Kuçi dhe kanë hapur zjarr në drejtimin e tij. Nga të shtënat, 33 vjeçari ka pësuar dëmtime të lehta dhe ndodhet jashtë rrezikut për jetën.
Policia bën të ditur se, pas veprimeve të thelluara hetimore, janë identifikuar dhe shpallur në kërkim tre shtetas të dyshuar për autorësinë e sulmit:
- A N, 38 vjeç, banues në Durrës
- F B, 22 vjeç, banues në Tiranë
- B Ç, 34 vjeç, banues në Durrës
Hetimet vijojnë me qëllim dokumentimin e plotë të rrethanave, kapjen e autorëve dhe përcaktimin e motivit të ngjarjes. Policia është duke kontrolluar disa zona në Durrës dhe Tiranë në funksion të operacionit për arrestimin e tyre.
