Tensionet në Shkup u rritën pas incidenteve gjatë kremtimeve të 28 Nëntorit, Ditës së Pavarësisë së Shqipërisë dhe Ditës së Flamurit Kombëtar.
Ministria e Brendshme e Maqedonisë së Veriut njoftoi arrestimin e tetë personave të përfshirë në djegien e flamurit shtetëror maqedonas, një akt që ka shkaktuar reagime të ashpra politike dhe shoqërore.
Incidenti ndodhi në lagjen Bit Pazar të Çairit, ku tradicionalisht shqiptarët festojnë këtë ditë të rëndësishme kombëtare. Sipas autoriteteve, në mesin e të arrestuarve është një i mitur, ndërsa të tjerët janë të moshave 18 deri në 21 vjeç. Katër nga të ndaluarit po hetohen për “nxitje të urrejtjes ndëretnike, racore dhe fetare”, një akuzë që mund të dënohet deri në një vit burgim.
Pamjet e shpërndara në rrjetet sociale, që tregojnë momentin e djegies së flamurit maqedonas, kanë ndezur reagime të ashpra nga partitë politike në Maqedoninë e Veriut.
Partia qeverisëse, VMRO-DPMNE, dënoi ashpër incidentin, duke e cilësuar atë si një akt me prapavijë politike që synon të nxisë përçarje ndëretnike. Ajo kërkoi vënien përpara drejtësisë të përgjegjësve dhe shprehjen e një qëndrimi të qartë kundër urrejtjes ndëretnike.
LSDM
Ndërkohë, Lidhja Social Demokrate në opozitë (LSDM) kritikoi qeverinë dhe ministrin e Brendshëm Pançe Toshkovski për mungesën e masave parandaluese dhe reagimin e vonuar të policisë. Ata kërkuan dorëheqjen e ministrit, duke e akuzuar atë për paaftësi dhe neglizhencë në trajtimin e situatës.
Nga ana tjetër, koalicioni VLEN, një bllok politik shqiptar që është pjesë e qeverisë, dënoi incidentin por hodhi akuza drejt Bashkimit Demokratik për Integrim (BDI). Sipas tyre, BDI po përpiqet të destabilizojë vendin për përfitime politike.
BDI dhe Aleanca për Shqiptarët, partitë opozitare shqiptare, gjithashtu dënuan incidentin, por vunë në pah, siç e cilësuan, qasjen selektive të policisë. Sipas tyre, masat e marra nga forcat e rendit ishin të njëanshme dhe synonin vetëm ndëshkimin e shqiptarëve të përfshirë në incidente.
BDI
Në një deklaratë të saj, BDI akuzoi policinë për nxitjen e incidentit. Sipas kësaj partie, forcat e rendit bllokuan rrugët dhe penguan qytetarët shqiptarë të merrnin pjesë në festimet e organizuara në sheshin Skënderbe të Shkupit.
Incidenti ka rikthyer në qendër të vëmendjes tensionet ndëretnike dhe sfidat e bashkëjetesës mes komuniteteve në Maqedoninë e Veriut. Ndërsa partitë politike shkëmbejnë akuza, opinioni publik kërkon qetësi dhe drejtësi për të shmangur përshkallëzimin e situatës.
Dita e 28 Nëntorit, që zakonisht shënon një festë të krenarisë dhe bashkimit kombëtar për shqiptarët, këtë vit ka marrë një kthesë të hidhur, duke ekspozuar tensionet e pashuara në një shoqëri që ende përballet me sfida të mëdha integrimi dhe tolerancë ndëretnike.
