Forcat e Ndërhyrjes së Shpejtë kanë kryer një aksion të gjerë në Krujë dhe Nikël gjatë mëngjesit të së mërkurës, ku janë kryer kontrolle në disa banesa të fisit Rraja. Nga ky operacion janë arrestuar gjashtë persona, mes të cilëve ndodhet edhe Rexhep Rraja, djali i ish deputetit socialist Rrahman Rraja.
Lista e personave të arrestuar është si më poshtë.
Marvin Bushati
Agim Nina, i identifikuar edhe me emrin Lorenc Izet Selmani
Sokol Qaja
Gazmir Rraja
Perparim Rraja
Rexhep Rraja
Në këtë çështje janë caktuar gjithsej katërmbëdhjetë masa sigurie. Katër persona rezultojnë të shpallur në kërkim, ndërsa tre të tjerë që ndodhen në burg për vepra penale të ndryshme, Islam Sefa, Aldo Gjini dhe Jani Çavo, janë njoftuar me masën e re të sigurisë që lidhet me këtë hetim.
Sipas autoriteteve, të arrestuarit akuzohen për trafikim të lëndëve narkotike të kryer në bashkëpunim, aktivitet që dyshohet se është zhvilluar në kuadër të një grupi të strukturuar kriminal.
