Partia e Marine Le Pen në Francë ka hapur diskutimin për një projektligj që do të mund të rikthente bordellot si struktura të organizuara në formë kooperative. Deputeti Jean Philippe Tanguy deklaroi se këto ambiente duhet të drejtohen nga vetë punonjëset e seksit, duke theksuar se ato do të ishin të para në menaxhimin e kushteve të tyre të punës.
Prostitucioni si aktivitet nuk është i ndaluar në Francë, por bordellot u mbyllën ligjërisht në vitin 1946. Një ligj i vitit 2016 vendos gjobë për klientët, duke e vështirësuar më tej situatën e punonjëseve të seksit. Sipas Tanguy, kriminalizimi i klientëve ka çuar në rritjen e rreziqeve dhe pasigurisë për gratë që operojnë në këtë industri, prandaj duhen krijuar hapësira të sigurta dhe të ligjshme, të vetë-menaxhuara nga ato.
Deputeti deklaroi se modeli i ri do të funksiononte si një kooperativë, me pronësi dhe drejtim nga punonjëset e seksit. Edhe pse ai pretendon se ka mbështetjen e Le Pen për këtë nismë, një tjetër zyrtar i partisë ka pranuar se kjo çështje nuk është diskutuar ende brenda strukturave të Tubimit Kombëtar.
Debate të tilla janë zhvilluar edhe në vende të tjera të Evropës. Në Itali, një pjesë e politikanëve në koalicionin e Giorgia Melonit janë shprehur pro rihapjes së bordellove dhe rregullimit të tregut të prostitucionit, por deri më tani nuk është marrë asnjë vendim i konkretizuar.
