Kreu i PD-së në Durrës, Ardian Muka, ka reaguar me tone të ashpra ndaj Ervin Salianjit, duke e akuzuar se prej ditësh po e sulmon publikisht në studio televizive. Muka tha se nuk kishte planifikuar të përgjigjej, por se ishte detyruar nga, siç i quajti ai, sulmet e përsëritura dhe të pajustifikuara.
Ai sqaroi se raporti i tij i vetëm me ish-kryebashkiakun Vangjush Dako ka qenë betejë elektorale dhe kundërshti politike, duke mohuar kategorikisht çdo lidhje interesash apo bashkëpunimi. Muka përmendi garën e vitit 2022 si kandidat i PD-së, protestat për mbrojtjen e trashëgimisë kulturore dhe punën e tij në Këshillin Bashkiak, ku thotë se ka qenë gjithmonë në mbrojtje të interesit publik.
Në kundërpërgjigjen e tij, ai listoi disa akuza ndaj Salianjit: negociatat për “shitjen e zgjedhjeve të vitit 2015”, roli në përçarjen e demokratëve në vitin 2022 dhe pengimi i procesit për denoncimin e Fatmir Xhafajt. Muka e akuzoi gjithashtu se po punon për të devijuar energjinë e demokratëve nga beteja ndaj qeverisë, duke krijuar mbështetje jashtë strukturave të PD-së në Durrës.
Sipas tij, PD ka nevojë urgjente për ndryshim, por “jo me fytyrat e gabuara”. Muka e mbylli reagimin me deklaratën se Ervin Salianji “do të mbahet mend si personi që sulmoi demokratët që mendonin ndryshe”.
