Ambasada e Rusisë në Shqipëri ka përcjellë urime për veteranët e Luftës Antifashiste Nacionalçlirimtare, pasardhësit e tyre dhe qytetarët shqiptarë me rastin e Ditës së Çlirimit nga pushtuesit nazifashistë.
Në mesazhin e saj theksohet se falë patriotizmit dhe sakrificës së partizanëve shqiptarë në kuadër të Frontit Nacionalçlirimtar, territori i Shqipërisë u çlirua në nëntor të vitit 1944. Sipas njoftimit, 28 mijë shqiptarë dhanë jetën për lirinë e vendit.
Ambasada shpreh nderim për ata që luftuan me armë në dorë dhe mbrojtën të drejtën për një të ardhme më të mirë, duke theksuar se kontributi i popullit shqiptar në fitoren kundër nazizmit nuk do të harrohet.
