Policia ka finalizuar operacionin e quajtur Violent, i cili çoi në kapjen dhe ndalimin e një 29 vjeçari të dënuar më parë për dhunë në familje. Ngjarja nisi pasi në Komisariatin e Policisë Kurbin u raportua një rast dhune në qytetin e Laçit. Shërbimet policore shkuan menjëherë në adresën e dhënë dhe nisën veprimet hetimore.
Sipas të dhënave të para, shtetasi R Gj, 29 vjeç, kishte ushtruar dhunë fizike ndaj babait të tij K Gj, 66 vjeç, dhe ishte larguar menjëherë nga banesa. Për shkak të rrezikut që paraqiste situata, u kërkua ndërhyrja e Forcës Kombëtare të Sigurisë për të ndihmuar në gjetjen dhe ndalimin e tij.
Pas informacioneve operative dhe kërkimeve të vazhdueshme, shërbimet e Policisë Kurbin në bashkëpunim me Forcën Kombëtare të Sigurisë arritën të lokalizojnë dhe arrestojnë të riun në kuadër të operacionit Violent. Ai u kap në zonën e Zejmenit në Lezhë, ku fshihej.
Gjatë kontrollit në banesën ku ndodhej, u gjet dhe u sekuestrua një sasi prej 105 gramësh lënde të dyshuar kanabis që u mor në cilësinë e provës materiale.
Materialet e çështjes janë dërguar në Prokurorinë e Lezhës për vijimin e procedurave ligjore.
