Një operacion i zhvilluar nga strukturat e DVP Kukës në bashkëpunim me Komisariatin e Tropojës dhe me ndihmën e forcës Shqiponja ka çuar në ndalimin e Lek Pepgjonajt, 29 vjeç, banues në Pukë. Sipas autoriteteve ai dyshohet se kishte transportuar me varkë një sasi droge, lëndë plasëse dhe municion luftarak me qëllim trafikimin e tyre drejt Kosovës.
Pasi u siguruan të dhëna operative se një person po përgatiste kalimin e një ngarkese të paligjshme drejt kufirit, u organizua ndjekja dhe më pas kapja e tij. Në fshatin Dushaj shërbimet e policisë ndaluan automjetin tip Volkswagen që përdorte i dyshuari. Në bagazh u gjetën të fshehura 1.2 kilogramë kanabis, 405 gram tritol, 51 kapsolla detonatore, 5 metra fitil zjarrpërcjellës, sasi municioni luftarak dhe një shumë parash.
Nga hetimet paraprake rezulton se i riu dyshohet se kishte kaluar ngarkesën me varkë në liqen nga fshati Apripë i Pukës deri në Tropojë dhe më pas kishte lënë automjetin për të shmangur kontrollet rrugore.
Autoritetet bëjnë të ditur se vijon puna në bashkëpunim me Prokurorinë dhe me institucionet homologe të Kosovës për identifikimin dhe ndalimin e personit që do të merrte lëndët e paligjshme në territorin kosovar.
Materialet janë dërguar në Prokurori për procedurat e mëtejshme ligjore.
