Në Vlorë po rikthehet një nga aktivitetet sportive më të njohura të fundvitit, Vlora Half Marathon, e cila këtë vit zhvillohet për herë të pestë me moton Vrapojmë për Pavarësinë. Pritet që rreth 400 vrapues nga Shqipëria dhe nga vende të ndryshme të botës të marrin pjesë në këtë maratonë që tashmë është kthyer në traditë për qytetin bregdetar.
Garat do të zhvillohen në tre distanca të ndryshme, 5 kilometra, 10 kilometra dhe 21 kilometra, me itinerar përgjatë vijës kryesore të qytetit, nga Lungomare deri në zona të tjera të njohura turistike të Vlorës.
Aktiviteti organizohet në kuadër të festimeve të muajit të Pavarësisë dhe është përshëndetur nga drejtues të institucioneve vendore dhe sportive, të cilët theksuan rëndësinë e pjesëmarrjes së gjerë dhe vlerën promocionale që maratona sjell për qytetin.
Vlora Half Marathon vazhdon të mbetet një prej ngjarjeve sportive më të spikatura të kësaj periudhe në Vlorë.
