28 apo 29 Nëntori? Edhe këtë 81-vjetor të majtët e të djathtët mbeten “të përçarë” nëse Shqipëria u çlirua më 28 apo 29 nëntor. Historiani Paskal Milo i ka konsideruar të pavlera dhe të pambështetura shkencërisht debatet e përvitshme për datën e çlirimit.
Ai ka theksuar se polemika të tilla janë të kota dhe nuk i shërbejnë as opinionit publik e as historisë.
“Kam mbi 30 vite jetë aktive politike e shkencore. Ky debat nuk ka asnjë vlerë. Është për të qarë e për të qeshur që diskutojmë prej tri dekadash se kur iku gjermani i fundit nga Shqipëria. Kjo nuk përcaktoi fatin e vendit. Ajo që ka rëndësi është lufta antifashiste dhe qëndrimi i shumicës së shqiptarëve në anën e duhur të historisë”, ka thënë Milo.
Historiani po ashtu ka theksuar se në tekstet shkencore kjo çështje nuk do të marrë aspak rëndësi, pasi në vetvete ajo nuk ka peshë historiografike. “Shkenca nuk mund të merret me detaje të tilla për të kaluar kohën. Nuk do të harxhohet as letër e as bojë për këtë debat. Detyra jonë është të shkruajmë një histori që t’i qëndrojë kohës, jo debateve të ditës”, thotë ai.
Sipas historianit, ajo që ka rëndësi është vetë lufta dhe rezistenca antifashiste e shumicës së shqiptarëve dhe duhet të krenohemi se Shqipëria, në këtë betejë të madhe të përbotshme, u ndodh në anën e duhur të historisë. Çdo debat tjetër, thekson Milo, është kalimtar e pa vlerë.
