Përgjimet e siguruara nga dosja e komunikimeve në aplikacionin Sky ECC tregojnë se agjenti Igli Haxhiaj ka zhvilluar biseda të hapura për blerjen dhe testimin e kokainës me anëtarë të një grupi kriminal. Komunikimet i përkasin periudhës kur ai shërbente në Forcën Lëvizëse Operacionale, përpara se të transferohej në Drejtorinë e Antiterrorit.
Sipas dosjes, Haxhiaj ka marrë në telefonin e tij fotografi të kokainës së presuar, të cilave u përgjigjet duke komentuar cilësinë dhe duke kërkuar mostër për provë. Në një prej bisedave të datës 22 tetor 2020 ai nis dialogun me shprehjen “o boso, ca o kjo me, e bukur duket”. Bashkëbiseduesi i përgjigjet me fjalën “mall”, ndërsa diskutimi vijon me çmimet e një kilogrami kokaine.
Nga përmbajtja, bëhet e qartë se po flitej për një kilogram kokainë, të quajtur ndryshe “një bukë”, e cila kushtonte 37 mijë euro në Durrës. Biseda vijon me kërkesën e Haxhiajt për të provuar dy gram të lëndës, me qëllim verifikimin e cilësisë.
Në vijim të komunikimit bashkëbiseduesi njofton se lënda narkotike gjendet në Durrës dhe se ka tre lloje stampash. Haxhiaj pyet nëse produkti është i mirë dhe kërkon një mostër për ta ruajtur dhe testuar. Bashkëbiseduesi i thotë se vetë nuk e ka provuar, por i kanë thënë se është cilësor.
Gjatë bisedës përmenden foto të tjera të lëndës së presuar dhe specifikime të çmimeve për produkte që kishin mbërritur nga vende të Amerikës Latine.
Hetimi i SPAK evidenton se komunikimet e Haxhiajt në aplikacionin Sky ECC tregojnë diskutime të vazhdueshme për blerje, shitje dhe transport të lëndëve narkotike. Megjithëse nuk është sekuestruar ndonjë sasi gjatë këtij episodi specifik, përmbajtja e bisedave vërteton njohurinë dhe përfshirjen e tij të mundshme në veprimtari të lidhura me tregtimin e drogës.
Hetimet vijojnë për të dokumentuar plotësisht rolin e tij dhe lidhjet me grupet kriminale të përmendura në dosje.
