Një aksident rrugor ka ndodhur pasditen e sotme në autostradën Tiranë Durrës, ku një veturë është përplasur nga një kamion mallrash me targa të Kosovës. Përplasja ka qenë e fortë dhe si pasojë makina ka dalë nga rruga dhe është përmbysur në një kanal pranë autostradës.
Dy personat që udhëtonin me automjet kanë mbetur të plagosur, por ndodhen jashtë rrezikut për jetën. Ata kanë arritur të dalin nga mjeti dhe janë transportuar me urgjencë në spital për marrjen e ndihmës mjekësore.
Në vendngjarje kanë mbërritur shërbimet e policisë dhe ato mjekësore. Aksidenti ka shkaktuar trafik të rënduar, pasi njëra nga korsitë e autostradës është bllokuar. Grupi hetimor po punon për të sqaruar rrethanat dhe shkaqet e ngjarjes.
