Raporti më i fundit i Organizatës Botërore të Shëndetësisë ka zbuluar se pothuajse gjysma e fëmijëve shqiptarë kanë dhëmbë të prishur. Sipas të dhënave 48.6 për qind e fëmijëve të moshës 1 deri në 9 vjeç vuajnë nga kariesi dentar një shifër dukshëm mbi mesataren europiane.
Shqipëria renditet e katërta në Europë për numrin e lartë të fëmijëve me probleme dentare pas Bosnjës Serbisë dhe Maqedonisë së Veriut. Ekspertët e shëndetit publik theksojnë se sëmundjet orale prekin një pjesë të madhe të popullsisë në kontinent dhe ndikojnë ndjeshëm edhe te shëndeti i përgjithshëm.
Specialistët e stomatologjisë nënvizojnë se shkaqet kryesore të kësaj situate janë higjiena e ulët orale dhe konsumimi i produkteve dhe pijeve me përmbajtje të lartë sheqeri nga fëmijët. Problemi mbetet i përhapur pavarësisht përpjekjeve për edukimin e brezave të rinj në parandalimin e sëmundjeve të gojës.
Raporti vë në dukje se sfida nuk është vetëm te fëmijët pasi edhe të rriturit përballen me probleme serioze dentare. Sipas OBSH një në tre persona mbi moshën gjashtëdhjetë vjeç në Shqipëri i ka humbur të gjithë dhëmbët dhe përdor proteza.
